सन्तोष दहित/दाङ

घोराही २, पनौराम रलक गुम्राहा थारु सांस्कृतिक संग्राहलयकेलाग जिल्ला विकास समिति दाङम ५ लाख बजेट आइल बा। पुरातत्व विभाग काठमाण्डौसे संग्राहलयके भौतिक सुधार ओ निर्माणके लाग बजेट अइलक जिल्ला विकास समिति दाङके पयर्टन फोकल पर्सन एवम राप्ती पर्यटन समितिके सदस्य सचिव डा. गोविन्द आचार्य लौव अग्रासनह जानकारीडेल।

 सात बर्ष आघ स्थापना हुइलक संग्राहलय आजकाल बन्दके अवस्थाम बा। संग्राहलयक भौतिक सुधारकलाग पुर्व सभासद शान्ता चौधरीके पहलम पुरात्व विभागसे तत्कालके लाग ५ लाख बजेट आइलक हो। संग्राहलय सुधारके लाग जिल्ला विकास समितिम बजेट अइलसेफे आम्मिहनसम सम्झौता कर किउ निअइलक सदस्य सचिव आचार्य बटोइल। संग्राहलयके लाग जिल्ला विकास समितिम बजेट आइल बा कैख सम्वन्धित निकायम जानकारी फे करासेक्लक सचिव आचार्य बटोइल। उहफे आम्मिहनसम किउ आपन सम्पर्कम निअइलक उहाकल–’आर्थिक मसान्त फे ओराइ लागल, एक महिनाकेल बा।  २/४ दिनम सम्झौता निहुइलसे यी बजेट फ्रिज हुइना सम्भावना बा।’

 उहाँके अनुसार पहिलाके किस्ता दुइ लाख ५० हजार आइल बा। पहिलाके किस्ताके काम ओरैइलसे द्धासर किस्ताम फे दुइ लाख ५० हजार अइना हो, आचार्य कल–’यी तरिकाले जैना हो कलसे संग्राहलयके नाउम अइलक बजेट फ्रिज हुइना सम्भावना डेख पर्ठा।’

 यिहोर संग्राहलयके संरक्षण कर्टी अइलक थारु कल्याणकारिण सभा दाङके सभापति तेजमान चौधरी संग्राहलयके नाउम अइलक बजेटके बारेमा आपनह कुछ जानकारी निअइलक बटोइथ। संग्राहलयके रेखदेख आम्मिहन थारु कल्याणकारिणी सभासे कर्टी आइल बा तर बजेट क्याकर नाउँम अइथा कुछ पत्ता निहो चौधरीकल– ‘जिल्ला विकास समिति फे बजेट आइल बा कैख किहिन जानकारी करैठा, थाहा निहो।’

 यदपी जिल्ला विकास समितिसे संग्राहलयके व्यवस्थापन समिति रलक थम्मन चौधरीह जानकारी करैलक थाहा हुइल बा। संग्राहलय व्यवस्थापन समितिके संयोजक थम्मन चौधरीफे जिल्ला विकास समितिसे बजेट अइलक जानकारी अइलक स्विकर्ल तर सम्झौता कसिक कर्ना कना विषयम छलफल हुइटी रलक चौधरी बटोइल। यिहोर थम्मन चौधरीके संयोजकत्वम रलक व्यवस्थापन समितिह थारु कल्याणकारिणी सभासे  निमन्ना सभापति चौधरी बटोइल ।