नेपालको आन्तरिक मामिलामा हस्तक्षेप गरेको भन्दै चिनियाँ राजदूत छन् सोङलाई फिर्ता गर्न माग गरिएको छ। राष्ट्रिय एकता अभियानले बिहीबार काठमाडौंस्थित चिनियाँ दूतावास अगाडि प्रदर्शन गर्दै राजदूतलाई फिर्ता गर्न माग गरेको हो।

अभियानका अध्यक्ष विनय यादवको अगुवाईमा भएको विरोध प्रदर्शनमा चिनियाँ राजदूतलाई फिर्ता गर, ऋणजाल चाहिँदैन, देश डुबाउन पाइँदैन, आन्तरिक मामिलामा हस्तक्षेप बन्द गर, चिनियाँ विस्तारवाद मुर्दावादलगायतका नारा लगाएका थिए।

प्रदर्शनमा मधेस सम्पर्क समितिका संयोजक बिनोद सिंह, अभियानका महासचिव डा. प्रभात कुशवाहा, विद्यार्थी परिषदका पप्पु यादव, युवानेता धिरज गिरी, अभियन्ता शिव पासवान, गणेश कुमारसिंह लगायत सहभागिता थिए।

चिनियाँ राजदूतले गैरकूटनीतिक अभिव्यक्ति दिएर नेपाल-भारत सम्बन्धमाथि प्रहार गरेको प्रदर्शनकारीको भनाइ छ। चीनले आफ्नो रणनीतिक योजनाको लागि नेपालमाथि ऋणको भारी बोकाएको भन्दै चिनियाँ राजदूत नेपाल-भारतबीचको सम्बन्ध बिगार्न भूमिका खेलिरहेको उनीहरूको आरोप छ।