नेपालका लागि भारतीय राजदूत नविन श्रीवास्तवले शुक्रबार उपल्लो मुस्ताङ पुगेर एक गुम्बा स्कुलको आवासीय भवन शिलन्यास गरेका छन्। लोमान्थाङ गाउँपालिका-१ छोसेरस्थित लोवो नाम्ड्रोलिङ गुम्बा स्कुलको नयाँ बन्ने आवासीय भवनको भारतीय राजदूत श्रीवास्तव र लोमान्थाङ गाउँपालिकाका अध्यक्ष टसीनर्बु गुरुङले संयुक्तरूपमा शिलन्यास गरेका हुन्।

राजदूत श्रीवास्तवसहित उनका फस्ट सेक्रेटरी अविनाश कुमार सिंह पोखरा-जोमसोम हवाई मार्ग हुँदै जोमसोमबाट गुम्बा स्कुलको आवासीय भवन शिलान्यास गर्न सडक मार्ग हुँदै उपल्लो मुस्ताङ पुगेका थिए। उपल्लो मुस्ताङ पुगेको भारतीय दूतावासको टोलीलाई स्थानीय जनप्रतिनिधि, कर्मचारी, गुम्बा स्कुलका लामा र स्थानीयबासीले स्वागत गरेका थिए।

शिलन्यास गर्नुअघि लामाहरूले बौद्ध धर्म परम्पराअनुसार पूजापाठ गरेका थिए। पूजा सकिएलगत्तै राजदूत श्रीवास्तव र लोमान्थाङ गाउँपालिकाका अध्यक्ष टसीनर्बु गुरुङले भवनको शिलन्यास गरेको लोमान्थाङ गाउँपालिकाका प्रशासन प्रमुख विकास केशीले जानकारी दिए।

गुम्बाको आवासीय भवन शिलन्यासपछि आयोजित कार्यक्रममा भारतीय राजदुत नविन श्रीवास्तवले नेपाल-भारत सहयोग विकास कार्यक्रमअन्तर्गत गण्डकी प्रदेशमा ५९ वटा योजनामा भारतीय दूतावासको लागत साझेदारीका योजनाहरू रहेको जानकारी दिए। जसमध्ये मुस्ताङ जिल्लामा मात्रै १७ वटा योजनामा भारतीय लागत साझेदारीमा पूर्वाधार निर्माण भएको राजदूत श्रीवास्तवले बताए। ‘यहाँको विकास र समृद्धिका लागि भारत सरकार सदैव तत्पर छ। २० करोडसम्मका योजना नेपाल सरकारले सिधै कार्यान्वयन गर्ने कार्यविधि बनाइदिएको छ,’ उनले भने।

राजदूत श्रीवास्तवले नेपाल सरकारको अधिन र शर्तमा रहेर कार्यक्रम र योजना ल्याएमा भारतले सिधै सहयोग गर्न तत्पर रहेको बताए। यसअघि दूतावास र गाउँपालिकाको लागत साझेदारी गर्दा गाउँपालिकाले २० प्रतिशत साझेदारी गर्नुपर्ने प्रावधान भएकोमा अब त्यो ५ प्रतिशतमात्रै साझेदारी गरे पुग्ने उनको भनाइ छ।

भारतीय राजदूतावासले उपल्लो मुस्ताङको छोसेरमा गुम्बा स्कुल र आवासीय भवन निर्माणका लागि ६ करोड ९७ लाख आर्थिक अनुदान दिने गरी गत कात्तिकमा सम्झौता भएको थियो। छोसेरका दिव्यदीप माध्यमिक विद्यालयको आवासीय भवन र गुम्बा स्कुलको आवासीय भवन बनाउन दूतावासले ८० प्रतिशत र गाउँपालिकाले २० प्रतिशत लागत साझेदारी गर्ने गरी सम्झौता पत्र हस्ताक्षर भएको थियो। सरकारी स्कुल र गुम्बा स्कुल भवन बनाउन गाउँपालिकाले २० प्रतिशतको साझेदारीअन्तर्गत १ करोड ७४ लाख ४० हजार लगानी गर्नेछ।