चितवनको सिमलतालमा भएको बस दुर्घटनामा परी बेपत्ता भएका ३६ यात्रु र दुई बसको खोजी कार्य त्रिशूली नदीको तीव्र बहाबका कारण निकै चुनौतीपूर्ण बनेको छ। चार गोताखोर र १२ प्राविधिक विज्ञ रहेको भारतीय टोली नदीको उच्च बहाब र टर्बिडिटीमा आफ्नो उपकरण प्रभावहीन देखिएपछि आइतबार स्वदेश फर्किएको हो।

चितवनका सहायक प्रमुख जिल्ला अधिकारी खिमानन्द भुसालले भने, ‘त्रिशूली नदीको बहाब र टर्बिडिटी सोचेभन्दा धेरै चुनौतीपूर्ण देखियो। उहाँहरूलाई पनि अनुभव प्राप्त गर्नुभयो।’

त्रिशूलीमा बस र बेपत्ताहरूको खोजी चुनौती बनिरहेका बेला नेपालका लागि चिनियाँ राजदूत छन् सोङले मजाकीय टिप्पणी गरेका छन्। उनले एक्समा लेखेका छन्, ‘कतिपयले मेरो टिप्पणीलाई अनुपयुक्त भएको तर्क गर्छन्। उहाँहरूलाई मेरो जवाफ: टिप्पणीमा के गल्ती छ? खोजीलाई गति दिन र सबै तरिकाले सहज बनाउनु पर्दैन? यदि खोजको गति बढाउन चुम्बक आवश्यक छ भने, चुम्बक खोज्नुहोस्। चुम्बक किन हरायो? मानिसहरूले बेपत्ताको खोजीकार्य नै बन्द गर्नेतर्फ सोच्न थाल्छन्।’

खोजीको क्रममा त्रिशूली नदीमा १९ किलोको चुम्बक हराएको थियो। जुन, बस खोजीकै क्रममा भेटियो पनि। त्यसपछि राजदूत सोङले फेरि ट्वीटरमा लेखे, ‘यदि यो समाचार सत्य हो भने राम्रो समाचार हो। अब खोजीमा ध्यान दिनुहोस्, छिटो गर्नुहोस्। उद्धार टोलीलाई शुभकामना।’

राजदूत सोङको टिप्पणीपछि राष्ट्रिय मानव अधिकार आयोग र महिला आयोगका पूर्व आयुक्त एवं अधिवक्ता मोहना अन्सारीले कडा टिप्पणी गरेकी छन्। उनले भनेकी छन्, ‘वाह, कूटनीतिज्ञको यस्तो पो टिप्पणी।’ एक्स प्रयोगकर्ता सदीक्षा कार्कीले पनि भनेकी छन्, ‘धन्न दीपक मनाङेले गन्जीसम्म लगाएर लाज छोप्देको छ र। नत्र छिमेकीले उदाङ्गै पार्ने रछन्।’

राजदूत सोङको टिप्पणीलाई भारतीय र नेपाली टोलीको क्षमतालाई चुनौती दिएको मानिएको छ। आलोचकहरूको तर्क छ कि उद्धार प्रयासको आलोचना गर्नुको सट्टा, राजदूतले चीनलगायत विश्वबाट साहयता खोजिदिएको भए पो राम्रो।