राजधानीबासी थारूहरूले अस्टिम्की पर्व मनाउने भएका छन्। काठमाडौंमा रहेका विभिन्न संघसंस्थाको आयोजनामा भदौ १० गते अस्टिम्की मनाउन लागिएको हो। शनिबार भृकुटीमण्डपमा बसेको बैठकले काठमाडौंको बुद्धनगरस्थित क्वालिटी ब्यांक्वेटमा अस्टिम्की मनाउने निर्णय गरिएको छ।

बैठकले अग्रासन थारु महिला समूहकी चम्पा चौधरीको संयोजकमा मूल आयोजक समिति गठन गरिएको छ। १० सदस्यीय समितिमा अन्जु चौधरीलाई सदस्य सचिवको जिम्मेवारी तोकिएको छ। अस्टिम्की पर्वलाई भब्यरूपले मनाउन विभिन्न उपसमितिहरू पनि गठन गरिएको छ।

आर्थिक समितिमा किरण चौधरी, प्रचार प्रसार समितिमा सरला चौधरी, मञ्च व्यवस्थापन समितिमा अग्रासन थारू महिला समूह, सांस्कृतिक समितिमा राष्ट्रिय थारू कलाकार मञ्च, पूजा व्यवस्थापनमा अग्रासन महिला समूह, स्वयंसेवक समितिमा अग्रासन थारू महिला समूह, ब्यानर समितिमा बलराम चौधरी रहेका छन्।

त्यस्तै बैठकले ७ सदस्यीय सल्लाहकार समिति पनि गठन गरेको छ। समितिमा शिवबहादुर चौधरी, मिनराज चौधरी, शत्रुघन चौधरी, नन्दुराज चौधरी, डा. कृष्णराज सर्वहारी, बलराम चौधरी र रामबहादुर चौधरी रहेका छन्।
बैठकले पर्यटन राज्यमन्त्री अरुण कुमार चौधरीलाई प्रमुख अतिथि बनाउने निर्णयसमेत गरेको छ।