पर्साको पटेर्वा सुगौली गाउँपालिकाको अध्यक्ष र उपाध्यक्ष कांग्रेसले जितेको छ। गाउँपालिकाको अध्यक्षमा कांग्रेसका दिनेशकुमार चौधरी ५ हजार १४४ मतका साथ विजयी भएका छन्। उनी निकटतम प्रतिद्वन्द्वीसित १२ सय मत अन्तरले विजयी भएका हुन्।

नेपाली कांग्रेसका सुदूरपश्चिम प्रदेशका उपसभाति एवं पूर्वराज्यमन्त्री जनकराज चौधरीको वडामा नागरिक उन्मुक्ति पार्टीले विजय हासिल गरेको छ। सो पार्टीका अनर चौधरी अत्यधिक मतका साथ वडा अध्यक्षमा निर्वाचित भएका हुन्। उनले कांग्रेस उम्मेदवारलाई २२६ मतान्तरले पराजित गर्दै ८०३ मत प्राप्त गरे।

पश्चिम नवलपरासीको सरावल गाउँपालिकाको अध्यक्ष र उपाध्यक्षमा एमालेका उम्मेदवार विजयी भएका छन् । अध्यक्षमा सुखाडीप्रसाद चौधरी र उपाध्यक्षमा बासमती हरिजन विजयी भएका हुन् । अध्यक्ष पदमा निर्वाचित चौधरीले नेपाली कांग्रेसका अनिलकुमार गौडलाई २ हजार ९ सय ७० मतको फराकिलो अन्तरले पराजित गरे ।

बाँकेको डुडुवा गाउँपालिकामा कांग्रेसका उम्मेदवार विजयी भएका छन्। गाउँपालिकाको अध्यक्षमा नरेन्द्र चौधरी निर्वाचित भएका छन्। अध्यक्ष पदमा उनी दोस्रो कार्यकालका लागि निर्वाचित भएका हुन्।

पर्साको जिराभवानी गाउँपालिकामा अध्यक्ष र उपाध्यक्षमा नेपाली कांग्रेसका उम्मेदवार विजयी भएका छन्। अध्यक्षमा नेपाली कांग्रेसका ३२ वर्षीय अनोज चौधरी र उपाध्यक्षमा रेखा चौधरी विजयी भएका हुन्।

मोरङको कटहरी गाउँपालिका अध्यक्षमा कांग्रेसका देवराज चौधरी र उपाध्यक्षमा एमालेकी सितादेवी राजवंशी निर्वाचित भएका छन् । गाउँपालिका अध्यक्षमा कांग्रेसले निरन्तरता पाएको हो । एमालेका उम्मेदवार शुभाषकुमार सरदारलाई ९ सय ८३ मतान्तरले पछि पार्दै चाैधरी अध्यक्षमा निर्वाचित भएका हुन् ।

दाङको लमही नगरपालिकामा नेपाली कांग्रेस विजयी भएको छ। मेयरमा जोगराज चौधरी र उपमेयरमा लक्ष्मी योगी विजयी भएका हुन्। चौधरी २ हजार ३२ मतान्तरले मेयरमा विजयी भएका छन्। उनले ९ हजार ३ सय १७ मत प्राप्त गरे।

बर्दियाको राजापुर नगरपालिकाको मेयरमा नेकपा माओवादी केन्द्रका दिपेश थारु निर्वाचित भएका छन्। उनी ९ हजार ८०७ मत ल्याएर निर्वाचित भए भने उनका निकटतम प्रतिस्पर्धी नेपाली कांग्रेसक दीपकजंग शहले ९ हजार ७६० मत ल्याए।

कञ्चनपुरको बेलौरी नगरपालिकाकाे प्रमुख पदमा पुनः माओवादीका पाेतीलाल चाैधरी विजयी भएका छन्। उनले नेकपा एमालेका उम्मेदवार कमला बोहरालाई २०८४ मत अन्तरले पराजित गरेका छन्।